到馬會吃午餐，與幾位老友講波講馬。大導演係意大利擁躉，對意大利輸波，歸罪教練查柏東尼，佢認為托迪過份受重用，一俾對方嘜死，中鋒韋利就要等波踢。點解唔出迪比亞路與托迪合作呢？大導演認為查柏東尼應該被炒魷魚！講起波就多爭論，其實歐洲教練如艾歷臣、查柏東尼、金馬曹、禾拉等人，都非常保守，入咗一球就想死守，煲魚生粥，查柏東尼只係多啲「托迪偏好」而已。（順帶一提，讀者KCChan來電郵指出九○年世界盃決賽係由西德對阿根廷，唔係由西德對意大利，多謝指正。）
講完波就講馬，不過涉及太多私隱，不寫為妙，以免《蘋果》收律師信。講完馬就講邊行有得撈，當堂個個嚡嚡聲。連到馬會都因投注額下降而縮皮cutbudget。下季講馬節目收回自己製作，唔再外判，可見大家搵食艱難。測量C最近頻頻出擊，但佢自己講，命中率唔高，皆因人人㩒住荷包，唔敢輕舉妄動。測量C指馬會附近山頭嘅禮頓山，新樓已要入伙，一啲投資盤（其實係炒盤）唔想供樓，已陸續蝕讓，起碼唔見咗三成，係最新豪宅災區，即管如此，承接力唔高噃，因為今時今日，咁易搵人承接千幾萬嘅大單位，拎四五百萬出嚟，再月供五至七萬咩。測量C講：「唔怕失業嘅話，都有人供得起嘅，只係最怕一覺醒來，自己間公司變咗Worldcom，嚇餐死。想到咁，就不如唔買新豪宅啦。」