自我增值　修讀日文
GiGi下半世唔靠伊健

梁詠琪（GiGi）與鄭伊健雖然拍拖多時，但昨日GiGi卻表示將來不會單靠男友過活，一於靠自己過下半生，而她近日更開始為自己鋪定後路，修讀日文，打算將來轉行做繙譯。

梁詠琪（GiGi）昨日前往港台，出席「多媒體創意廊」網頁啟動儀式，GiGi前日剛剛為電影《絕世好B》拍攝完一場煞科戲，她說：「啱啱拍完通宵，我都瞓得幾個鐘咋。」

想學十六種語言
GiGi近期不停自我增值，問到她出席完記者會後可有工作，GiGi說：「我一陣去學日文，學多啲嘢老咗之後可以唔使憂嘛！將來就算我退出咗娛樂圈，我都可以做吓繙譯。本來我諗住學十六種語言，以前都學過法文，但係學咗三個月就冇學啦，因為條脷打晒結！」
雖然GiGi不停進修為將來鋪路，但她並非打算提早退休，GiGi解釋說：「唔係！但我都唔擔保我會一世唱歌㗎嘛！鋪定後路好啲。」

收六位數字版稅
GiGi又表示，近日她還收到以前由她創作的歌曲版權費，她說：「五首歌都有六位數字㗎！原來寫歌都幾好賺㗎，咁我又要努力啲，我下半生嘅幸福就係靠呢啲啦！」語畢至此，在場有人即時取笑GiGi的下半生幸福，應該是靠男友鄭伊健，GiGi即笑說：「都係靠自己好啲。」
此外，GiGi日前為上海的《生活月刊》雜誌拍攝封面照，她分別穿上ChristianDior及Gucci等新裝示人。
採訪：胡比
攝影：何國豪