美股休市，市況轉靜，連盈富基金（2800）銷情亦放慢，噚日只售出2200萬個單位。
港股全日升40點，收報10806，成交降至67.8億元。不過歐洲股市，特別係電訊股反彈，相信美國放完國慶假後，噚晚美股可能繼續反彈，從而帶動港股造好，下周初盈富應該會賣清。
卓施金網（8063）配售3.99億股，每股0.023元，雖較前收市價折讓11%，但配售後股價唔跌反升，全日勁升35%，收0.035元。卓施金網一直求財若渴，今次終於配得成股，其實都叫做好消息。
據聞今次呢手貨批咗畀班中資炒家，佔卓施金網14.36%，近排三四線股氣氛不俗，中資炒家可能炒炒吓會索性買埋個控制權。
駿雷國際（070）噚日再升8.1%，收0.16元，成交增至4780萬元。
ｉ師傅曾話過此股可能會供股。其實公司除咗供股外，亦可以選擇配股，據聞可能配股畀中資，配完股之後將有炒作，噚日已見唔少炒家入市為此股熱身。
東成控股（735）短期內將收購內地環保項目，可能發行新股進行收購。此股噚日升6.6%，收0.178元，成交高達4863萬元。
東成早前曾以每股0.10元，配售2.4億股新股。此股好難得有咁大成交，睇嚟再炒多一轉，就係時候散貨，過後一切將歸於平淡。因此，上咗車者要隨時諗住跳車。
阿虎