為迎合現今用家對安全，以及性能表現嘅要求，富豪車廠正研製一款極有可能被命名為V50嘅新車；佢除咗造型突出兼有出色安全配備外，據聞佢更會用以取代現有V40旅行車㖭。
雖然暫時未有太多關於此車嘅資料，但從預想圖中可以睇到，新車造型明顯較現有其他富豪車系，來得更富年輕活力感；當中一對炯炯有神嘅頭燈，同埋四輪大口徑跑車合金胎軨組合，就最能將呢個特點展露出來。車廂設備配搭齊全，而新款嘅安全帶、充氣簾幕等等亦屬標準裝備；另外，廠方更會為新車加裝一套新系統，當設於車身嘅感應器，偵測到與前車嘅距離太近的話，會有燈號提醒駕駛者要拉遠與前車之距離㖭。引擎配搭預算將會與現有V40型號相近，以迎合用家需要。若日後有最新消息的話，本欄會再為大家報道。