政府為慶祝香港回歸五周年，啱啱舉辦過大型煙花匯演，例牌咁吸引唔少香港人欣賞，若果你意猶未盡，又或覺得當晚煙花不外如是，咁就要試吓PS2日本同步推出嘅新Game《二人的電腦花火》嘞，因為呢隻Game集緊張、剌激、智力同靚畫面於一身，令到煙花唔再得個睇字，重可以親手連環引爆，重有中文字幕教你點玩㖭！
記者：徐影龍
日本人稱煙花為花火，顧名思義，今集《二人的電腦花火》，係將經典舊作《Fantavision》加入對戰模式，讓兩人一同感受互搶煙花引爆嘅智力遊戲，玩法相當新鮮剌激，就算冇人陪你雙打，都可選擇以電腦作操練對手，咪以為電腦唔夠人腦咁醒，頭兩關都重好易過到，到第三關ComicBoy開始已經漸漸難打，到第八關直頭超難，苦練一晚終於玩到第九關隱藏舞台，不過已經筋疲力盡而敗。
若能順利攻陷最後首領ComputerX，便可開啟Option中的選項，包括自由轉換重播鏡頭、高級技巧教授、另一雙打模式等隱藏要素，要Unlock所有選項，相信要花一段時間鑽研連鎖技巧。
除加入雙打模式及新規則外，新作另一大特色就係轉換了舞台場景。舊作以世界各地夜景為舞台，基本上以環繞全世界一路打落去，而新作就衝出地球，直飛宇宙空間，所以背景會以廣大無比嘅太空為主，再加入巨大太空基地、宇宙船等背景，相當之有空間感，尤其係重播時自由轉換角度欣賞，真係可以感受到太空嗰種自由漂浮Feel。
至於畫面亦改進不少，背景豐富之外，亦加入各種唔同特殊煙花，如搶空間煙花、雙方對調煙花等，靈活運用可製造一連串引爆煙花效果，五顏六色嘅光影效果相當之壯觀華麗，可謂用盡PS2嘅光源處理晶片。
《二人的電腦花火》本身只需用左邊方向掣鎖定目標，一個○形掣作引爆，儲夠三個以上同色煙花便可引爆，睇落好似幾易玩，不過一玩就被其華麗畫面同玩法所吸引，尤其係連鎖引爆帶嚟嘅快感，絕非一般PuzzleGame咁悶。雖然操控簡單，不過玩落完全唔係咁普通，絕對係一隻易學難精嘅PuzzleGame，好彩遊戲內設有玩法同技巧說明。雖然Title選單仍然係日文，不過入到選項入面就會以中文字幕作介紹，包括基本玩法、連鎖技巧等，尤其係二人對戰模式需注意嘅地方，都會以全中文作詳細介紹，想喺Party中出盡風頭，就要先記熟各式規則同技巧嘞。
機種：PS2 開發商：SCE 遊戲類型：益智解謎 發售日期：已發售 售價：$232
1.毋須太花時間搜尋同色煙花，電腦會自動幫你鎖定目標，唯一要注意係唔好猛㩒引爆掣，因為唔夠三款同色煙花而引爆，不但唔成功，而且會浪費自己時間，變相減少連鎖數量。
2.亦唔好太貪心儲太多煙花先引爆，因為一段時間後煙花會逐漸消失，亦有機會被對手將煙花轉換，白白浪費一大串煙花連鎖。
3.多點利用「天女散花」、「母子連心」等誘爆特技，詳情可看Game內說明。
4.若對方搶先獲得StarMine同色煙花狀態，便需一邊擴大自己範圍，一邊想辦法引爆轉換型煙花，將對方優勢轉過來。
SCEH喺暑假有一輪大搞作，除重頭戲《GTConcept2002～日內瓦》會大搞活動外，呢隻《二人的電腦花火》都會舉辦比賽。讀者只需喺8月6日至10日，到九龍城廣場便可免費試玩及參加「PS2夏之花火祭」比賽，贏取包括PS2、新Game、遊戲精品等勁獎。會場將會模仿日本關西花火祭環境而布置，重有大量靚女着晒傳統Yukata服飾作宣傳，就算唔夠膽落場同人鬥，都不妨去感受下日本嘅煙花節氣氛，一家大細影相留念或試玩新Game，都可開心咁消磨一個周未。
PS2夏之花火祭
日期：
8月6日至10日試玩及報名
8月11日總決賽
時間：12:00pm至7:00pm
地點：九龍城廣場
費用：全免