聽講布力般對約基好有興趣，但就嫌六百萬鎊太貴，想曼聯減番啲。我求大俠都明曼聯當日用咗成千二萬鎊買約基番嚟，𠵱家要賣走佢，梗係唔想蝕太多；但既然約基都唔受重用，點解又唔益吓其他球會呢？
約基喺九九年幫曼聯攞咗三料冠軍之後，往後演出就跌晒watt，一年差過一年，唔再得到領隊費格遜重用；而上屆只係踢咗十六場波，入得一球。閒時佢冇嘢做，就去照顧當時大咗肚嘅女友佐敦，同埋做當時隻腳傷咗嘅碧咸嘅「柴可夫司機」，真係似保母多過似足球員。
查實約基射術唔錯，加上只係三十一歲，應該重有翻身機會。我求大俠真係希望曼聯可以畀條路佢行，畀佢轉會。重有，既然約基明知自己喺曼聯冇碇企，咪再喺度磨爛蓆，好應該主動啲同老費講想走，收平啲人工，又如何呢？
前南韓教練軒迪克旺爆燈，呢幾日應酬飲宴肯定未停過。之不過，佢喺禮拜五同南韓正式講拜拜，但係佢究竟返荷蘭定係去英格蘭，重係一個謎。雖然聽講佢應承去恩浩雲教波，但突然走出列斯呢個程咬金，所以如果佢喺英格蘭出現，真係一啲都唔奇，鬼叫人哋搶手咩，多啲選擇係正常嘅。
朗拿度早前話因為個仔認唔到佢，佢先至要剪個河童頭，但點知佢個仔一樣認唔出係佢，重要連佢阿媽都話難睇，要佢轉髮型。計我求大俠話，朗拿度想個仔認得佢，辦法其實好簡單，得閒陪佢多啲，唔好掛住去泡。𠵱家啲細路仔認人咁叻，見得你多，自然認得你啦。
今屆溫布頓網賽女單決賽，又係大威對細威，真係覺得有啲悶。𠵱家個女子網壇俾佢兩姊妹玩晒，幾乎個個大賽都係佢兩個爭冠軍，但係冇計啦，鬼叫佢哋超晒班。呢個世界就係咁，強勝弱，不過我求大俠真係希望早啲有其他女網手加入戰團，好似球技唔差嘅新晉玉女韓迪卓娃，真係睇波都開心啲啦。
富咸究竟簽唔簽前意大利國腳後衞比拿利禾，至今重未有答案，好似話人工傾唔掂。其實比拿利禾係就係幾出名，不過年紀唔細，今年成三十四歲人，未必頂得住以速度見稱嘅英超聯。所以鍾意出風頭嘅富商阿法耶茲都要諗清楚呀，有時得個名，唔啱踢都係搵嚟都嘥氣。