恒指升40點，期指升120點，變成高水42點。由恒指Call輪升幅同恒指Put輪跌幅嚟睇，短期大市仍然係指向上面，除非外圍股市唔生性。
升幅勁嘅窩輪中，有1件係中遠Call輪9300，升33%，另1件係新世界Call輪9147，升夠40%。
中遠太平洋（1199）收6.55元，原地踏步。中遠另1隻Call輪9286收21.9仙，跌3%，但隻9300則由31.5仙殺上42仙，最高重做過50仙。唔係乾升，有7球易手，銀碼近3百粒。
9300今年11月到期，溢價17.7%，槓桿率15.6倍。喺正股冇變化情況下，隻輪昨日咁升，似乎夾硬嚟。行使價7.288元，隻輪係價外輪。正股幾個月內要升11%，隻輪先至唔使變廢紙；正股要升到7.7元以上，隻輪最後先至值今日個價。
新世界（017）升10仙，新世界Call輪9147由11.8仙彈上16.5仙。
9147下月12日夠鐘，溢價8.7%，槓桿率38.8倍。正股做6.40元，1個月之內升上7元以上，揸9147有得賺，有一定值博率，當然上車前最好預咗會冇晒。
章盛