港股噚日反覆上升40點，收10806。恒指一周埋單升208點，升幅1.9%。周線圖上周出現十字星，本周以陽燭上升，形成向好嘅早晨之星，下周港股可看高一線。
噚日按原定部署，早市初段喺0.65元沽出10萬份新地輪9371獲利，之後隻輪曾短暫跌至0.59元低位，但好快就抽番上0.62至0.63元水平橫行，趙飛雲見尾市個勢跌唔落，再買1000股新地（016）正股。呢個部署主要為咗迴避假期前美股不明朗因素，因此先收割獲利甚豐嘅新地輪9371，而買多1000股新地正股，係唔想錯過下周一恒指可能出現裂口大升嘅機會。另一方面，就算外圍出現突變，正股亦可以一守，唔似窩輪可以由大贏變輸。總括而言，就係放假前先穩住勝果，留番下周再博過。
睇番噚日恒指嘅走勢，其實一副蓄勢待破嘅格局，可惜噚日係星期五，大家都對美股假期後復市有些少戒心，唔敢去得太盡，恒指稍為升破20日線收市，9RSI亦升破50中軸，其實反映投資者對後市睇法偏好。
趙飛雲