藝術家擊敗機械人，全港高興，左丁山到現在都未碰到一個德國擁躉。決賽當晚，左丁山大破慳囊，買齊西班牙火腿、鏞記燒鵝、上等日本刺身、象拔蚌等等喺屋企擺自助餐，請咗成班親戚到屋企睇波，提早六時開飯，七點鐘就對住電視機，為巴西隊歡呼。
德國果然老謀深算，一開波就搶攻，顯然係希望先拔頭籌，射入一球就死守，意圖悶死巴西。呢條橋好好，幾乎得米，點知巴西素來最弱嘅守門員，今年表現特佳，馬高斯勇救兩個險球。
德國人無法得逞之後，就俾巴西慢慢控制比賽節奏，上半場臨完場已經射門好有威脅，下半場鋼門接波甩手，俾朗拿度執死雞，咁就玩完。唉，任禾拉同教練團部電腦點樣千算萬算，都算唔到簡尼會失拖㗎，正是謀事在人，成事在天，以為最穩陣啦，鋼門竟會變成豆腐閘，世事就係如此奇妙。巴西李華度其實踢得好沉，但入球兩次都有佢嘅間接功勞，啲藝術家嘅一剎那創意又係幾得人驚嘅。
我哋嗌到聲都沙晒，睇見巴西贏二比○，高興非常，左丁山後來對讀緊中一嘅外甥講：「立下大志氣，踢唔到世界盃，要入一流大學，你着緊件哈佛大學T恤，不如大個仔就讀哈佛、牛津之類啦！」𠵱家啲細路真蠱惑，竟然如此回答：「我哋班Form1仔都有傾過，入哈佛牛津冇問題，就係哈爾濱佛教大學同埋牛頭角津貼學校，簡稱哈佛牛津！」左丁山為之吹鬚睩眼，想搶番佢口中件燒鵝。