港股噚日大升186點，收報10765，成交亦增至82億元，大市氣氛明顯轉好。
不過盈富基金（2800）銷情就不如前日，只賣得1.02億個單位。黑客話，因為港股與美股走勢近日呈現背馳，恒指相對偏高，現價再大手掃貨未必有着數，因此噚日只有對沖基金認購盈富，長線嘅基金仍冇意思入市。
散戶對長江生命科技（8222）反應比預期冷淡，與tom.com（8001）招股時到處大排長龍嘅情況大相逕庭，超人效應終於要面臨考驗。
不過，據聞短線風險基金仍對長科看好，因為佢嘅集資能力較高，可招攬足夠科研人才發展業務，成功機會較大，就算未能研究出類似愛滋病雞尾酒療法或偉哥等藥品，至少都可以研製出唔少補健及美容產品，亦足以大賺一筆，前景比tom.com更佳，業務亦更實在。
長科今次集資額唔細，上市後要大幅炒高絕唔容易，市場現時傳出暗盤價升至4元，可信性實在令人懷疑。
產銷印刷線路板嘅富昌國際（916），近日跌至0.139元有見底迹象，股價開始反彈，噚日升至0.156元收市，反彈幅度達12.2％。
據聞有炒家開始部署炒作，管理層近排又頻頻見證券分析員，相信會有一番作為。
不過，富昌今次純粹炒股價及PE偏低，唔會有太激嘅動作。
阿 虎