前日食物環境衞生署公布觀塘「新輔仁小食」食物唔衞生，導致五十六人中毒。呢單新聞無綫亦有報道，之但係就詳盡過頭，連一啲同「新輔仁」無關嘅食物都俾佢哋影埋出嚟，出產嗰啲食物嘅食店東主李小姐當然好唔高興，噚日打電話上商台節目《風波裡的茶杯》投訴，佢話無綫個記者前日要求拍攝佢間食店嘅時候，聲稱係介紹觀塘嘅特色小食，點知畫面出街，旁述係講緊食物中毒，李小姐覺得有被搵笨嘅感覺。
當呢個投訴喺大氣電波中散播緊嘅時候，無綫電視新聞部助理總監張志剛正揸緊車返工，一聽到當堂心下一沉，返到公司即刻調查，證實投訴成立，惟有當住廣大聽眾之前向李小姐道歉。佢話無綫新聞部絕對唔容許記者用唔正當手法攞新聞，新聞部會就今次事件內部處理。無綫新聞部噚日開嘅例會亦有討論呢件事，八方好擔心有記者會被處分，但係張志剛死都唔肯講會點樣「處理」，惟有希望個記者吉人天相。
傳真︰2623-9278
電郵︰