隔晚美股反跌為升，港股高收，恒指彈升186點。先幾日最超賣嘅股份，例如和黃（013），一升就係3.9%，和黃Call輪升到七彩。
恒指要再去，一定會有重磅藍籌伴住，滙豐（005）係其中之一，昨日跑輸大市，只有50仙進帳，過去4日喺89元上下浮沉，整固一輪之後，有機會上到94元。有4.25元水位，4.7%幅度唔算太大，抱呢個希望亦唔係不切實際。
滙豐Call輪，值得搵一兩件玩吓。最正路對象係9030，數據非常靚。下月初到期，現價72仙，溢價只係0.9%，槓桿率有12.5倍。正股見目標價94元，9030見1.06元，有近5成升幅希望。
如果想搏殺，想贏得多啲（睇錯嘅話自然會輸多好多），則揀9198同9262，畀高啲溢價，換取有較大爆炸力嘅槓桿率。
滙豐Call輪9030成交金額排第2位，排第1位嘅係昨日所講嘅長實Call輪9252。
和黃勁升，將會帶動長實（001）。長實Call輪9252好值得博，9月初到期，現價69仙，溢價2.7%，槓桿率9.7倍。長實上破7字，9252見1字頭。
章 盛