有時人旺真係唔到你唔服，錦上添花嘅事亦特別多。前日長江生命科技（8222）招股，港股即刻轉跌為升，連周三晚美股亦係先大跌後升贈興，造就有利條件。噚日港股大升，而扮演及時雨嘅大摩，出報告指和黃（013）3G估值近零實屬太悲觀，調高和黃投資評級至增持，至於目標價由73元降至72元，以和黃現時水平而言，其實只係明貶暗褒，因此和黃噚日勁升3.9%，成為恒指大升186點嘅火車頭。
恒指經昨日大升，MACD線稍微升破訊號線，啟示中線走勢出現轉機。此外，恒指昨升破5月延伸嘅下降軌阻力，只要守穩升軌（現處10660）之上，升勢未完。今日如能進一步升破20日線（現處10834）阻力，9RSI將配合升破50中軸，技術進一步向好，後市可睇高一線，恒指Call輪9201可伺機追入。
新地（016）近兩日走勢的確靚，新地Call輪9371噚日再升18%，收0.65元，3日升近50%。睇技術走勢，新地仍有餘未盡，今日有機上試50日線63.67元，可惜今日係星期五，假期前尾市通常有獲利回吐，由於窩輪波幅大，趙飛雲會睇位先食胡，候回吐再買過。
趙飛雲