問責制開波，班新貴一個個爭出鏡，記者忙到團團轉，差啲唔記得重有一個「妾身未明」嘅「局長」周德熙。
原來周兄上周日去咗西安睇兵馬俑，前日先返香港。可能佢冇眼睇呢台戲，寧願去睇吓的唔識郁嘅傀儡，順便緬懷吓秦始皇。聽講周「局長」同阿董重未傾掂數，特首因為有大員左右，由頭到尾個新內閣都無預佢，結果周「局長」只好放大假。
八方心諗，周「局長」呢單嘢都算新鮮，以前邊會有為政府服務半生、做到D8咁高級嘅官，係全冇犯錯情況下會冇端端冇咗個位，又冇適當安排。呢個例子，恐怕會摧毀成個公務員銓敍制度，人人有辦睇，點會有士氣?
講開又講，雖然葉劉死撐，但八方知道班高級公僕真係好冇癮，唔係因為減薪，而係睇唔過眼的新手法，例如向傳媒放流料，令自己食黃連；至於實際待遇變化亦令人沮喪。好似班常任秘書長，連坐開嘅寶馬都冇埋，要轉坐日本車，由黑車變白車真係唔易適應。
重有，佢哋一夜之間連官階都變埋，亦百般滋味。比如A1明明係董太專利，點知原本屬D8嘅政務官，七月開始都坐晒A1位；事緣以前班D8叫「局長」，現已降做
「首長」。咁點同屬D6嘅「首長甲級政務官」區分呢？惟有開多個「首長級甲一級政務官」（即A1級）啦。於是，媽打李麗娟、俞小姐、Fanny羅、尤太、李淑儀、鬍鬚仔曾俊華等，以後就會同董太平起平坐。
傳真︰2623-9278
電郵︰