政府上個禮拜公布顧問報告，指機場管理局行政總監合埋年薪應為五百九十四萬元。當時有人睇機管局年報，發覺該局最高人工個位每年都不足四百萬元，以為香港委屈咗來自美國杜邦化工嘅彭定中總監。
機管局前日發出二○○二年度新年報，披露最高薪者年薪係五百五十至六百萬元。八方問彭總監呢個人係咪佢，佢無否認。不過，佢並冇逆市加薪五成，因為二○○一年度佢剛履新，只返咗工三個月，年報上最高人工嗰個唔係佢，○二年度之數據才真正反映佢嘅市場價格。所以話佢人工偏低唔正確，話佢大幅加人工亦係誤會。
機管局上年度員工薪酬總開支由八億五千八百萬元加到八億九千四百萬元，多咗三千六百萬元，不過純利增幅更大，多賺兩倍幾，總共二億三千六百萬元。彭總監話，今年會努力再賺多啲，希望自己同機場一樣，都係物有所值。
早排港美談判開放天空，作為國泰股東既中信泰富主席榮智健發晒火，話主張開放天空嘅人係吳三桂，重叫持有美國護照嘅人「免開尊口」。八方問彭定中點睇，佢話唔覺榮太子係話緊佢（莫非話緊馮國經？）佢仍然堅持香港應該開放天空：「如果封閉會令經濟發展，那麼北韓應該是現今世界上最富有的國家。」
（圖）彭定中年薪近六百萬元。
傳真︰2623-9278
電郵︰