葉童同張艾嘉喺五月中應宣明會邀請，去咗斯里蘭卡探訪五日，重喺當地助養咗一個八歲嘅小朋友阿寶。葉童日前同記者表示，以前佢覺得助養小朋友要負好大責任，但經過今次探訪，佢嘅觀念改變咗，葉童話：「見到阿寶嗰陣感覺好強烈，佢哋成家人一見到我即刻向我跪拜，其實我每個月只係捐二百蚊，已經可以令佢哋成家人生活有改善，嗰一刻覺得好有意義。」
葉童又話今次探訪令佢對人生有咗新嘅體驗，佢話：「我見到呢班小朋友，覺得唔應該用憐憫或者可憐嘅心態去睇佢哋，而佢哋亦教曉我體會生命嘅可貴，同埋好敬佩佢哋樂天知命嘅性格。」
葉童重話打算喺自己能力範圍之內，再助養四位小朋友。
施念慈噚日喺尖沙嘴出席新書簽約儀式，問到佢幾時至打算生BB，佢話：「要兩、三年後先生，我怕變癲婆。奶奶就冇催我，反而我媽咪就叫我快啲生，我會諗吓先，我老公比我鍾意細路。」施念慈表示會全職做作家，而佢十月就會推出一本結婚指南。
由英皇同無綫合辦嘅「2002全球華人新秀歌唱大賽」，會喺下月十八日舉行，英皇今日會搞一個講座，請咗Twins、容祖兒、王傑同英皇高層主講。Twins年資最淺，所以佢哋一知要主講就耍手擰頭，當然最後佢哋反對無效，惟有腳震震上陣啦。
日本搖滾班霸GLAY，噚日喺北京出席記者會，正式宣布今年十月三十日喺北京工人體育館舉行大型演唱會，作為中日友好建交三十周年嘅紀念活動。早前有傳GLAY受到有北韓人闖入瀋陽日本領事館事件影響，所以喺北京突然延期舉行記招，甚至取消演唱，𠵱家fans可以安心喇！
康華嘅皮膚一向唔錯，佢最近好開心，因為佢得到一個法國護膚品牌Nature's嘅免費贊助。
康華日前就去拎一批免費護膚品，佢噚日話：「我自己先做『白老鼠』，試過好好用，所以又立即拎一批畀親友試用，一於有好嘢益吓大家。」
台灣創作歌手周杰倫，已鐵定喺今個月十八日推出第三隻專輯《八度空間》，由於早前有傳聞話周杰倫新專輯唔可以喺今個月如期推出，唱片公司收到唔少歌迷嘅查詢，搞到周杰倫要澄清話：「我已經錄好九首歌，只是剩下一首歌，七月中推出完全沒有問題。」
吳宇森之前旋風式嚟香港宣傳新片《烈血追風》後，前日又喺台灣為新片宣傳。吳宇森提到之前去巴黎宣傳時，亞倫狄龍專誠去探佢，吳宇森大讚亞倫狄龍雖然已經六十幾歲，但依然好有精神同魅力，亞倫狄龍重話如果可以同周潤發合作，佢會即刻由法國趕去參與拍攝。
洪天明噚日出席喺電視城舉行嘅「七月星辰」，二十八歲嘅洪天明覺得自己已經大個仔，鍾意清靜嘅生日。問佢緋聞女友徐子淇有冇表示，佢話：「佢有打畀我，同我講生日快樂，好多人都有約我，但我都唔去。」洪天明又撐徐子淇唔算肥，佢話：「唔係好過份啫，肥啲有乜問題？」