前身叫齊翔，聲言可能轉型投資國內環保項目嘅東成控股（735），近日股價企得好硬淨，噚日大市升近二百點，東成升咗5％，收16.7仙，創出52周新高。
經紀陳話，東成搞開鰻魚生意，間公司上個月以每股10仙，配售2.4億股新股，集資2400萬元。至於今次喺國內搞咩環保項目，佢唔係太清楚。
佢話，批新股落喺一班唔簡單嘅炒家手上，新股本周剛剛出籠，相信家陣批貨仍處於搓波仔階段，成交再大啲就可能係佢地散貨之時。不過，由於呢班炒家頗為有米，加上老闆又同大陸關係良好，所以炒起嚟都相當有氣勢。
至於東成主席另外持有嘅科建集團（563），除咗易手初期股價波動過一陣，至今完全冇聲氣，表現同東成非常唔同。經紀陳解釋，科建新收購冇耐，內部重有好多嘢要執，睇怕重有一排靜。
慕容小初