霸王花功能清熱解燥、除積熱，乾品霸王花喺藥材雜貨舖好容易搵到，今日我肥師奶要介紹嘅唔係乾品，而係較少見嘅新鮮霸王花，每年夏天期間至搵到咋！而且只有部份菜檔至有得賣，要買好趁手。
霸王花除可清熱解毒外，以之配瘦肉煲湯飲用，更有化痰除咳作用，湯水清甜美味，老少都啱飲。
$10/3個 部份菜檔有售
天時暑熱，我肥師奶最鍾意以瓜滾湯或做餸，其中冬瓜更加係我首選之一，冬瓜價廉物美，貨源又足，容易買到，冬瓜可以話係夏天嘅至佳良伴。
除咗冬瓜外，市面重有冬瓜嘅副產品，冬瓜茶係一款方便裝消暑飲料，無時間煲湯但又想品嘗吓冬瓜嘅味道，呢個方便飲料可以過吓口癮，帶微微冬瓜味，惟味道稍為甜咗少少，雪凍效果較佳，消暑又清熱，兩者兼得。
$5/罐city'super有售
文：肥師奶