昨日由四叔李兆基贊助嘅香港青年協會李兆基小學，舉行第一屆畢業禮。佢老人家出錢出力，老遠跑到入天水圍頒發畢業證書俾班畢業生，其間都唔知笑得幾溫馨，頻頻同小學生握手。
四叔德高望重，江湖中無人不識，但估唔到連小學生都識得，話說有個小「風紀」突然走埋身邊，要求簽名，四叔一於冇托手踭。
呢間小學係青協第一間小學，去年開幕，全校有超過一千名學生，據青協總幹事王䓪鳴說，各班房都裝設電腦投射器，讓老師可以用先進設備教學。四叔重唔係一次過捐錢，起完學校就算，佢昨日又捐多二百八十八萬元增添設備，又話，為咗小朋友可以發展唔同嘅興趣，所以應承未來五年，每年捐五十萬，合共二百五十萬元，讓學校購置音樂器材。
今年新界區有大把樓盤推出，地產代理積極部署搶灘，美記繼上半年在新界開咗6間分行後，下半年會再開多6間，請多100人。其中一間喺珀麗灣，咁咪要請好多人囉？營業董事布少明話，因為要請「熟手技工」，所以惟有向同行挖角，暗示主要對手中記係對象之一。佢重話，今個月10號，青衣灝景灣分行會有多20人加盟，全部都係挖番嚟。𠵱家各大代理行都話要請人，睇嚟一場挖角戰勢所難免，但對打工仔嚟講，就係好消息。
2002年優質建築大獎結果已在上個月底公布，由志蓮淨苑奪得。志蓮淨苑佛寺建築群係現有最完整嘅仿唐木結構建築群，融合佛教同唐代建築藝術，重全部按唐代的規格嚟起。此一傑作，由新世界屬下協興建築擔任項目經理統籌承建。
講起歷史建築，上個月市建局截收意向書嘅西港城商場，喺1906年起，𠵱家已列為歷史古迹，投到承租權嘅財團要負責埋物業維修。新世界屬下嘅富城物業都有遞交意向書。蘭西聽市場人士講，富城入意向書，可能係同協興有承建志蓮淨苑嘅經驗有關，第日投到，都有協興可以幫手搞好歷史古迹。唔知同樣入咗意向書嘅長實，係咪都因為有搞虎豹別墅經驗呢？
繼美聯同中原之後，利記噚日請新地雷霆遊船河，睇馬灣珀麗灣，佢哋用6000蚊，租咗隻新渡輪兩粒鐘，有成千人上船，當中有近100枱客。由於雷生即場解答所有問題，啲客都好投入，其中一個客提出，既然珀麗灣唔畀車入，咁業主住客點樣運啲家具入去呢？雷生話有寬限期，叫買家唔使擔心。啲代理最關心就係佣金，雷生話會好可觀，相信代理聽到，應可放心努力搵客。聽講噚日利記即場收到幾十張票，果然有計。
珀麗灣今個月底會開放示範單位，新地會負責提供食物同住宿畀代理，估計要成幾十萬。而連埋畀睇樓人士嘅食物開支，聽講會達到1000萬。點解咁犀利？因為啲食物係由尖沙嘴帝苑酒店提供，自然矜貴。
另外，新地又會安排新渡輪，接載睇樓人士去馬灣，響中環4號碼頭上船，但住客日後就會用2號碼頭搭船番屋企，不過原來去大嶼山迪士尼都係響呢個碼頭上船，所以珀麗灣嘅買家日後要小心，唔係上錯船就麻煩嘞。
東涌海堤灣畔都有機會今個月推出，鴻記田老闆今日就帶同百幾個夥計，到現場踩盤，等佢哋熟習環境，重會安排睇埋東堤灣畔嘅單位。