英皇今年除了力捧三T小花外，其實早於年初已簽咗兩個新人Kenny同Steven，連月來呢兩位陳冠希師弟，正秘密苦練，準備喺年底出擊，走活潑㗎仔KinkiKids路線，挑戰陽光組合Shine。
其實英皇早喺去年就開始物色男版Twins嘅班底，結果選中咗周英杰（Bernard）、新城DJ周子駒（Cyrus）、港台Y2K新人關智斌（Kenny）同曾拍富士激光沖印廣告嘅男模張致恆（Steven）四個，由於英皇覺得Bernard係可造之材，所以已安排佢率先獨立發展，至於Kenny同Steven就暫被列作男版Twins組合人選。現年二十歲嘅Kenny同年僅十七歲嘅Steven被英皇甄選後，二人即簽下一貫嘅十年賣身契。
其實男版Twins早喺英皇三周年嘅慶典上，已初次登場，近期Kenny重喺Twins新曲《眼紅紅》嘅MV內擔任男主角。
郭富城（城城）噚日喺尖沙嘴出席「AaronKwok日本演唱會2002」記者會，城城喺下月十四、十六、十七號分別喺大阪、東京、橫濱開演唱會，城城話已經通知咗藤原紀香，如果紀香得閒一定會到，不過就算紀香出現只會當佢係小fans，唔會安排佢上台唱歌。
劉德華（華仔）嘅國語專輯《美麗的一天》今日喺台灣推出，其中有首歌叫《親愛的媽媽》，係華仔親自填詞。華仔噚日喺台灣話細個時曾嬲過媽咪，佢話：「我最討厭媽咪喺我朋友前打我耳光。十二歲嗰年，媽咪叫我買菜，但我要打籃球唔肯去，媽咪就打我，結果我哋冷戰咗兩個月。」
宣萱近日兩度遭人偷錢，五日內唔見兩百蚊，佢為咗要伸張正義，唔俾啲小偷繼續有機可乘，去咗差館報案，佢喺差館搞咗成晚，誓要將小偷繩之於法。而自此之後，宣萱就有咗個花名，係人見到佢都叫佢做「正義之星」，皆因佢嘅精神可嘉，宣萱噚日喺電影城話：「唔係兩百蚊嘅問題，係原則問題。」
英皇三T小花嘅EP喺下月推出，其中蔣雅文(Mandy)更擊敗鄭希怡(Yomiko)同劉思惠(Maggie)，率先接拍廣告，之前Twins曾拍攝CleanandClear嘅護膚品廣告，而Mandy就多得師姐帶挈，獲廣告商搵佢拍CleanandClear另一系列護膚品嘅電視廣告。
黃子華做《一觸即發》主持，做到鬼死咁灰，皆因佢主持嘅時候，咁啱撞正世界盃，噚日佢喺電視城化妝間，問記者佢個節目收視有幾多點？佢話：「我接個騷嗰時都諗住好過之前就算，真係冇得傾，連我自己都睇世界盃，點可以叫人睇我。」
盧巧音（Candy）噚日喺尖沙嘴為新歌《很想當媽媽》拍MV，講到時下年輕人都好反叛，佢話：「應該嘅，但係反叛完要反省，同埋要自我增值。」對於謝霆鋒撞車，Candy話：「我覺得呢啲嘢冇得勸，意外都冇人想，佢咁大個人應該識諗，我坐過佢快車都好驚。」
洪金寶(三毛)，洪天照兩父子𠵱家喺大陸拍新戲《特警飛龍》外景，三毛話天照第一次拍電影，已經有唔錯嘅表現，重話個仔都有興趣入娛樂圈發展。今個星期六，三毛會返香港出席張徹個喪禮，三毛話雖然未同張導演合作過，不過覺得佢係一個好值得人敬重嘅長輩。