美股前晚大跌，杜指能否守得住9000都成問題，不過噚日亞洲股市唔少逆市上升，港股升87點，收報10579，成交73億元。
盈富基金（2800）噚日再售出2.71億個單位，換言之盈富今季發售總額已售出半數，銷情比預期理想得多，相信會有更多淡友出嚟補倉，如果一旦售罄，港股壓力可大減。
長江生命科技（8222）一話上市，唔單止所謂嘅生化股偷步炒上，連超人曾染指嘅股仔都有異動，其中辰達永安（1189）勁升6.89％；和記港陸（715）升5.26％；大成生化（809）亦升4.24％，好似一齊慶賀長科上市咁款。
中華城市燃氣（603）噚日宣布終止發行3.5億元可換股票據計劃。
該批票據原本有一半配畀和黃（013）及德祥企業（372）。和黃及德祥企業打退堂鼓，但比較奇怪係中華燃氣不但唔跌，反而重勁升36％，收報0.118元。似乎反映中華燃氣幕後要打爭氣波，就算冇咗和黃嘅金手指亦一樣掂。
黑客話，中華燃氣嘅炒家主要係中資，引入和黃只不過係要佢嘅品牌，吸引散戶跟進，冇咗和黃唔代表幕後冇錢炒。不過，幕後人士可能要再諗計吸引散戶跟進，否則點樣散貨獲利？
Cookie話，最近三四線股轉趨活躍，要留意吓隻友聯建材（432），噚日升13.16%，收4.3仙，成交開始有增加迹象，傳聞幕後可能借勢炒上，方便前大股東減持。
阿 虎