昨日四位新局長加同兩個行會新丁，去港台錄歌搶民望，高唱《香港是我家》。四個新局長林瑞麟、唐英年、廖秀冬、何志平及兩行會新丁田北俊、鄭耀棠排排企中間做主角；王永平、李麗娟同陳婉嫻、蔡素玉、劉千石等十幾位立法會議員，以及謝霆鋒、容祖兒、梁詠琪等明星齊齊唱和。新局長呢啲造勢「騷」睇嚟有需要做多啲以提高知名度，因為主持伍家廉逐個局長問感受時，第一個問「民政事務局局長」，何志平醫生已經準備好燦爛笑容，點知跟住伍生講咗「林瑞麟」。搞到林瑞麟同何志平都相當尷尬。
唱歌時有音樂底嘅何志平最快上手，林瑞麟最投入，成日握緊拳頭作拼搏狀，腳郁郁。田北俊、唐英年同廖秀冬自認歌喉麻麻，細細聲唱重成日甩嘴。
﹙圖﹚新局長唱歌仔，林瑞麟（前排右二）握緊拳頭作拼搏狀，腳郁郁，最落力。
傳真︰2623-9278
電郵︰