踏入7月份，港股真係好似有啲轉機，美股周二晚繼續跌，但恒指噚日先跌後升，最後升87點，收10579。
近日外圍相當多暗湧，但恒指連續兩日低開高收，係咪有啲利好因素散戶暫時睇唔到？至於可見嘅好消息則係盈富基金（2800）兩日賣出一半，銷情較市場預期佳，盈富賣得靚，始終對市場有鼓舞作用，正如趙飛雲早前提過，盈富去貨速度快慢，亦係一個炒作藉口。歸根究柢，恒指經過個半月急跌，技術大超賣，大戶要繼續沽落去，需要有充份理由支持，況且大家單邊睇淡，大戶搵唔到對手，其實亦冇着數。
趙飛雲7月有個好開始，新地Call輪9371兩日升2成。中長線睇好新地走勢，新地正股可以揸到技術明顯轉壞才沽，但新地輪9371用嚟炒短線，有利潤則可以見機收割，沽完可以再買，買完可以再沽。技術上，新地噚日升破20日線阻力60.11元，10日線（現處58.75元）亦掉頭向上，稍後10日線有機上破20日線，形成黃金交叉，加上9RSI噚日亦配合升破50中軸，短期可睇高一線，如果外圍形勢冇突變，相信會升至50日線（現處63.71元）才有阻力。
趙飛雲