世界盃熱潮減退，發展商同地產代理又再全情投入新樓市場。講到下半年最矚目新盤，非新地馬灣珀麗灣莫屬。全城代理行都昅實呢個大盤，日日搞活動，狂谷宣傳。新地呢個盤揸fit人雷霆，就忙個不停，噚日出席美聯直升機遊馬灣後話，下個禮拜先至係高潮，內容當然要賣個關子。不過佢透露會響珀麗灣預留一座住宅，每間代理行都可分配一層，畀同事休息用，等佢哋可以專心搵客。
市況不景，不斷有酒樓結業，但空出舖位有啲好快又有食肆承租，飲食業情況都未必咁悲。話說西環卑路乍街堅城中心1樓，有2萬2千方呎，原本租予福星酒樓，後嚟由福豪酒樓頂租，最近又有新租客進駐，繼續做酒樓。新租客來自外區，月租30萬，平均每呎13個6，包埋冷氣同管理費。但拆開條數睇，原來冷氣同管理費竟然要17萬一個月，換句話講，層樓每呎租金5元9角，而冷氣同管理費就要7元7毫子一呎，真係「妹仔大過主人婆」。蘭西聽講，好多業主就係因為呢個原因，先至肯平啲將個單位租出去，所以市場上間唔中就有超平租個案出現。
九龍倉山頂豪宅樓盤「種植道1號」，啱啱落成，短期內將會招租，九龍倉助理董事黃光耀，今日率先招待新聞界參觀示範單位，到時就知個盤點豪法。發展商早排透露，有意開價五十蚊一呎，的確唔係普通人住得起。九龍倉自從由黃光耀負責賣樓後，幾個新盤都賣得唔錯，唔知佢搞租務成績又點呢？種植道1號共有48個單位，面積由1770到2280方呎。
講起豪宅租務，恒基地產半山豪宅富匯豪庭，上個月開始招租，最近傳出頂樓複式連私人泳池單位，會由恒基副主席林高演入住。富匯豪庭正式招租前，聽講響4月以每呎34蚊租出一個單位。
二手樓市交投委靡不振，中原地產中國部於是諗到一條好橋，就係將重點推介嘅大陸樓盤資料，擺喺中原香港全線160多間地舖。中原中國董事副總經理陸成話，暫時只集中推介投資成份較重，坐落大城市嘅優質樓盤，因為代理反映，佢地手頭都有客想買樓長線投資。
早前佢帶咗班同事去內地實地考察，發覺佢地對大陸樓好有興趣，為咗做得更有系統及專業，特別成立「地舖資源協調中心」，令香港代理增值，賺多一筆，又可以方便客戶查詢，實行雙贏互利。
蘭西希望同讀者多啲溝通，報料更加無任歡迎，電郵地址係