記唔記得某個通心粉廣告，有班科學家致力研究發明咗彈性氣墊，畫面出現咗一班人着住對鞋彈吓彈吓，好鬼過癮！可能大家都以為係天方夜譚，但日本有個叫中松義郎嘅發明家，真係發明咗一對彈跳鞋，着上之後可以彈嚟彈去、健步如飛。究竟係咪咁犀利，就等我哋徹底測試！
記者：張穎倫 攝影：周旭文 ImageGirl：Kiji
呢對彈跳鞋嘅日文名叫PyonPyon，喺6月中未正式發售時，發明者中松義郎已率先拖住個8歲𡃁仔，喺東京四圍彈。聽聞喺日本剛剛推出，已備受注目，相信成為今個暑假嘅潮流玩物一啲都唔難！
呢對彈跳鞋嘅鞋身設計同一般溜冰鞋差唔多，都係採用高筒及三重安全扣設計，着上後可以緊扣雙腳，唔怕因震盪而甩鞋出醜。佢嘅鞋底冇轆冇氣墊，取而代之係大大個膠製彈弓。呢對鞋原地跳嘅威力唔算好大，要發揮彈跳鞋威力，一定要不斷輕輕跳，增加彈弓壓力後，一般人可跳到2、3呎高，據發明者中松所講，玩家重可以利用騰空嘅時間做出各種花式㖭！
如果覺得以深色為主嘅彈跳鞋太過男性化的話，亦有其他幻彩顏色俾你選擇，其尺碼、彈力一樣，最啱女仔着住周圍跳。
除咗彈跳鞋新鮮滾熱辣之外，近排喺旺角街頭，亦掀起暴走鞋熱潮。唔少街頭型人都喺行人專用區一帶大玩暴走鞋花式，所以代理亦乘勢加入唔少新鞋款和鞋轆，等你改對靚鞋，玩更多花式。好似呢對HEELYS暴走鞋，外形同一般波鞋、行山鞋差唔多，唔太誇張，隨時喺鬧市中滑過都神不知鬼不覺。
一般暴走鞋都係送ABEC3嘅鞋轆，特點係速度唔高，最啱初學者玩。但想玩多啲花式就可以更換最高級嘅ABEC7鞋轆，行走時非常順滑，方便提高速度後大玩花式。而且更換過程方便，只要用手就可輕易更換安裝，話換就換。
同其他XGame一樣，暴走鞋都有自己嘅服飾襯埋一套。呢期陽光猛烈，最Hit嘅當然係Cap帽，一來遮住塊面，玩花式特別有型。另外，有頂帽擋住，就算30幾度喺街頭大玩花式，都唔怕曬親。
近排最流行嘅花式「蟹腳」，只要先向前滑行，然後將身體轉為橫行狀態，想靚啲就再將雙腳分開，繼續一路滑行就完成整套動作。難度雖然較高，但星期日喺旺角已好多人識玩。
JCShop（31022783）
銅鑼灣時代廣場8樓833號舖
暴Shop（30777077）
旺角西洋菜南街1號兆萬中心101號舖