450萬人翹首以待嘅PC名作《WARCRAFTIII:REIGNOFCHAOS》，終於喺今日（7月3日）正式作全球發行！呢一集《WARCRAFTIII》係同系列中首隻使用全3D畫面顯示嘅遊戲，非常創新地將「角色扮演」同「即時戰略」嘅遊戲元素二合為一，絕對係所有PCGamer今年必玩之作。全港只有500套的BoxSet特別版亦會同時推出，包裝同包含內容全部從未曝光，今日筆者就為大家搶先披露。
記者、攝影：朱崇德
《WARCRAFT》可算是BLIZZARD的成名之作，由94年的《WARCRAFT》、95年的《WARCRAFTII》，到今次的《WARCRAFTIII》，一等就是近7年了！可能大家等得太耐都變得有點急不及待，《WARCRAFTIII》的全球預訂數字竟然高達450萬套，破晒過往紀錄，亞太區亦高達200萬套，遠遠拋離同是BLIZZARD的另一熱賣作《DIABLOII》所創下100萬套的預訂紀錄！
今次《WARCRAFTIII》推出一個限量版BoxSet套裝，香港獲分配到約500套，官方建議售價為六百餘元，不過已有Game舖炒上$700至$800，預計今天首日開賣一定爭崩頭！
呢套BoxSet可算係賣大包之作，一盒之內除咗有一套《WARCRAFTIII》遊戲光碟之外，重送埋《WARCRAFTIII》CinematicDVD影碟、原音唱片、Figure（一隻）、T-shirt、特別收藏版說明書、8"×10"小插畫4幅、4大種族技能樹表和小冊子等，不過最值得珍藏嘅係本《THEARTOFWARCRAFT》畫集，二百餘頁粉紙，印刷精美，收藏了大量人設、插畫及Concept圖畫，好多重係從未向外公布的圖片，《WARCRAFT》迷絕對值得珍藏。
普通版遊戲則有人類（Human）、半獸人（Orc）、不死系（Undead）同夜精靈（NightElf）四個不同封面，跟Game有一隻半獸人的水杯送，售價$330。
遊戲發生在人類及半獸人的第二次大戰之後，戰役將成為Human、Orc、Undead及NightElf四個不同種族的角力賽！遊戲以全3D圖像畫面進行，還非常大膽地將「角色扮演」同「即時戰略」合二為一，簡單來說，遊戲的基本玩法和一般「即時戰略」非常相近，都是採集天然資源、建立軍隊，然後再以殲滅敵軍為目標，不過加入了一個Hero制度，可以為這個主角人物不斷升Level、學習新技能及尋找特別道具，以提升其作戰能力，戰事中Hero絕對有舉足輕重和反敗為勝的能力。
遊戲除了可以作故事單人模式進行外，玩家還可以在內聯網上連線對戰，不過大家需要留心Battle.net這個互聯網對戰功能，話唔定會好似《DIABLOII》一樣，上網打會有特別道具執都未定！
如果大家唔想買炒價限量版，筆者有個好提議，旺角電腦中心有間PCGame專門店，佢哋話明絕對唔會賣炒價，Game價同代理標出的六百餘元差不多，不過貨量肯定唔多，有興趣可以問吓！
店舖：E.D.CEXPRESS
電話：27810813
地址：旺角電腦中心一樓120號舖
早在個多星期前，香港的老翻場已經出現《WARCRAFTIII》盜版，遊戲封面標明「完全版」，重要賣到斷市，筆者幾經辛苦，走訪多個老翻黑點才找到一張「完全版WARCRAFTIII」。遊戲玩落同一般測試版有好明顯唔同，而且遊戲的完成度相當高，不過是否真正的「完全版」，則暫時無法證實！
不過大家要知道購買盜版遊戲是一種非常嚴重的侵犯版權行為，而且這類使用劃一CDKey的老翻，是絕對不能上Battle.net玩連線對戰的，這只會使大家失去了遊戲的趣味性，何況正版製作精美，有齊靚靚說明書同贈品，個Game重隨時玩你幾個月甚至成年，花三百幾蚊買隻正版計落都係一日一蚊啫！
香港代理：AltaMultimediaLtd.
電話：27638200
地址：觀塘鴻圖道57號南洋廣場2305室