巴西球員的更衣室內，朗拿度對李華度說：「喂，今屆你啲戲好搶喎，搞到個個淨係望實你，咁唔掂喎。」
「咁我收斂番啲啦，盡量唔好咁浮誇啦。」李華度說。
朗拿度轉頭又對朗拿甸奴說：「喂，你笠死施文嗰腳波好靚喎，加上個師奶頭又咁搶，𠵱家冇人望我喎。」
「咁我收斂番啲啦，不過你不如都諗吓個頭有乜搞作啦。」朗拿甸奴說。
結果朗拿度搞了一個《十兄弟》式的薯頭，但球迷們就算點鍾意朗拿度都冇人效法。
× × ×
英格蘭的更衣室內，教練艾歷臣在對球員教路，但風筒的聲浪越來越響，艾歷臣忍不住向碧咸說：「阿咸哥，麻煩你可唔可以叫你位御用髮型師停一停個風筒？」
「唔係吖嘛？踢波唔係贏就輸，但係個頭唔吹就一定唔挺，冇得傾。」碧咸一邊落gel一邊說，「重有呀，阿舒寧咸，唔該你一陣間頭十五分鐘唔好二傳畀波我頂住，因為啲gel未乾，一頂波成個髮型就會散，重有阿史高斯，你一陣間啲傳中波唔好畀咁急，如果唔係我走得促得滯就冇咁似model……」
× × ×
九龍灣世界盃嘉年華的更衣室內，達明對我說：「終於做完三十日，有冇唔捨得？」
「好捨得，連續三十日，南韓都冇我哋咁勤力。」我由衷地說。
達明與我終於可以鬆一口氣，向世界盃說聲再見，四年後再見。