新一季盈富（2800）首日售出10％，銷情算做唔錯，而港股在10400水平亦見支持，後市似乎可以睇高一線。不過，比較令人失望係中國並非如市場傳聞，喺7月1日宣布落實QDII，似乎江總關心香港政治多於經濟。不過，香港要靠大陸放水又實在羞家啲，其實國內一向都冇QDII呢支歌仔唱。
以前香港嘅股市同樓市高企時，引到中資流晒口水，將現金一籮籮咁抬落嚟香港炒餐飽，阿董其實要諗計增強港股及樓市嘅吸引力，到時自然大把水流入股市及樓市。
噚日太古A（019）勁跌3.5％，成交達3.73億元。有傳聞話，基金睇淡本地投資物業嘅租務市場，因此進行減持，吸納派息率高兼有增長潛力嘅中電控股（002），中電噚日雖然跟隨大市下跌2.58%，收報30.20元，但有大買盤喺30元水平守住，全日成交高達5.65億元，擺明係有大戶對撼。
電盈（008）出售40%CSL，其實反映公司睇淡本港流動電話市場，但噚日竟然有人借勢傳出數碼通（315）賣盤，一度將股價炒高5.68％，高見9.30元，最後升幅收窄至2.3％，收9元，成交達1020萬元，都唔知係咪有人想博大霧借消息出貨。
早前唔少大行以流動電話月費跌勢喘定，因而調高流動電話投資評級，畀機會班大戶出貨。事實上本港流動電話市場情況未有好轉，加上成本難以再進一步下調，數碼通轉虧為盈嘅機會變得渺茫，而其他對手股東背景不弱，叫價甚高，要進行併購又談何容易？
阿 虎