盧巧音（Candy）新歌《好心分手》推出後反應唔錯，Candy自己都話周不時行經時裝店之類嘅地方，都聽到人哋播呢首歌，但佢就覺得好奇怪，隻碟都未出，點解會有得播？後來有一日有歌迷搵Candy攞簽名，佢就知道點解。
Candy話：「個fans攞住我隻歌嘅翻版碟畀我簽名，都唔知嬲好定笑好，本來我擔心唔知歌迷鍾唔鍾意首歌，𠵱家就放心好多囉。」Candy呢首歌重成為兩間卡拉OK集團播放率最高歌曲，點唱超過八萬次。
而原本Candy隻新碟預計呢個月中推出，佢隨即同唱片公司提議不如今個禮拜出街，但時間太趕，唔知包裝趕唔趕得切，Candy就話唔介意落工廠幫手喎，認真心急。
台灣男子組合WeWe成員李威，日前喺大馬同謝霆鋒及Twins嘅蔡卓妍一齊拍可樂廣告，李威接受馬來西亞《光明日報》訪問時，話蔡卓妍前日拍完落水部份後，當晚就返港。
而本月底李威要再去大馬拍第三輯可樂廣告，八月份又要再喺大馬為偶像劇《吐司男之吻Part2》做宣傳，即係話呢兩個月佢都會經常進出台灣同馬來西亞。
人氣組合F4成員吳建豪，會喺暑假推出個人大碟，其中一首主打歌名為《MyFriend》。
吳建豪嘅唱片公司已經作好準備，稍後會搵五百位歌迷同吳建豪一齊拍MV，畀歌迷同偶像近距離接觸。而吳建豪𠵱家重喺西班牙拍緊《流星花園2》。
中建電訊集團有限公司主席麥紹棠，噚日喺金鐘舉行嘅「2001年最佳產品獎」記者會度，話同劉德華單官司純係商業行為，同埋以股東利益為大前提。雖然麥紹棠強調同華仔仍保持友好關係，不過佢又話對華仔好失望，因為華仔身為股東告自己公司，會俾人覺得唔團結。
麥紹棠個仔麥浚龍噚日去新城做訪問，問到佢老竇同劉德華嘅官司佢知多少？麥浚龍話：「其實我都唔係好清楚，近期我又掛住錄音，好少同屋企人見面。」講到早前有雜誌指佢老竇嘅公司雖然蝕錢，但仍然支高薪，問佢知唔知？麥浚龍話：「我冇乜理㗎！但聽到啲咁嘅消息都有唔開心。」
呂良偉前日喺北京返港，噚日就同老婆楊小娟、外父外母飲茶。之前張玉珊話過會搵佢老婆做纖體代言人，當時呂良偉曾極力反對，但噚日佢已改口風。
呂良偉話：「如果係以家庭主婦形象出現都冇問題嘅，但我始終鍾意太太身形圓圓哋，有啲肉先好睇。」
張可頤同陳容森噚日前後腳喺機場出現，張可頤同記者話今次去咗好多地方，其中一個係台灣，不過當記者問陳容森同可頤去咗幾多日嘅時候，陳容森就即刻用國語講謝謝，同埋話問番可頤。𠵱家呢個年代，竟然重有男仔怕醜過女仔。