一味窩輪：9049冇乜升好現象

隔晚美股又試散過，港股又點會有運行？不過情況唔係太惡劣，恒指由跌162點變跌106點，亞太區股市亦由低位回升，其中日股由急跌變微升。
另1個好現象（對好友嚟講）係，恒指跌1%，照計隻恒指Put輪9049應該升10%左右，但隻輪實際只係升得0.5%，收21仙。9049今個月底到期，𠵱家負溢價0.1%，槓桿率10倍。個市有乜變化，窩輪先行，淡友輪冇跟指數下跌而上升，代表個市就快回升，亦可以代表抵買，以前者可能性居多。
不過最終都要睇美股面色。美股如果再急挫，乜都係假，但美股若然企穩，能夠回升當然最好，則港股一次似樣嘅反彈就快出現。
個市如果真係好番，必然有啲重磅火車頭帶動，中移動（941）會係其中之一。

炒9044要速戰速決
中移動Call輪博反彈，得隻9044最啱埋手，下月初夠鐘，現價10.8仙，溢價4.6%，槓桿率21.0倍。隻輪唔係冇風險，如果正股到下月初都係𠵱家22.65元個價，隻輪最後同廢紙冇分別（隻輪行使價22.61元），炒嘅話要速戰速決。
章　盛