美國世界通訊復牌急跌9成，拖累周一晚美股大散，港股噚日早市最多跌過162點，低見10436，午市恒指喺10500附近窄幅爭持，最後收10491，跌106點。
可能成個6月份好少炒股票，趙飛雲噚日好似「餓波」復出嘅朗拿度，成日心思思想出擊，特別晏晝見地產股跌唔落，終於忍唔住手喺58.75元買咗1000股新地（016），及0.455元買入10萬份新地Call輪9371。雖然買入後有微利，但其實後市尚未明朗，有機會要坐艇，不過中長線始終睇好新地，即管先洗濕個頭。
噚日股票行稍為多咗人，大家嘅話題亦由足球轉到股票。中午有老友叫趙飛雲留意隻神州醫療（8186），話隻股早輪炒完後，有新炒家接力開車，借長江生命科技招股炒番轉，跟住重有消息跟尾。隻股噚日走勢確唔錯，不過趙飛雲對二三線概念股興趣唔大，而且唔想高追，0.51元附近則可以小注敲吓。
二三線實力股之中，太平協和（438）值得留意，但隻股唔容易玩。近期股價回落至0.50元水平，其實有一定值博率。公司喺上海有多個大project，他日重估資產唔講得笑。
趙飛雲