又到暑假！立法會開埋下月十二號嘅財務委員會會議就會休會，放假去也。八方聽聞每年休會，酒仙黃宜弘﹙圖﹚都會邀請各黨派的議員，去佢屋企敍一敍，豪飲一番。今年佢就有新玩意，改為請議員去東莞玩餐飽，事關佢喺東莞有座別墅，有二十五間房，真係成間古堡一樣。
但係去東莞好似危險啲，前一排先有班元朗鄉紳俾狗仔隊跟到佢哋去尋歡，原先想隨團嘅肥仔李華明就話唔怕，因為大家都攜眷出席喎。
唉，不過𠵱家乜都唔關肥仔明事啦，邊個叫佢啱啱又俾大陸收咗回鄉證，肥仔明再次打回原形做返荔枝明！佢噚日就寫咗封信畀特首，一來希望攞番個證，二來因今次加諸佢身上嘅危害國家安全罪名非輕，加上政府又話二十三條要立法，特首睇怕都要出嚟講番兩句，定一定肥仔個心。
傳真︰2623-9278
電郵︰