喺呢個世界盃期間，有睇我哋蘋果體育版嘅都會熟晒班專欄作家──行路人、高麗人、丘仔、聰仔同郭家明。真係唔經唔覺喺呢一個多月同佢哋培養咗一份難捨難離嘅感情。聽講一家大細等住佢養嘅行路人，會由日本個地盤轉去中國。呢個英國鬼真係唔簡單，六年前就係為咗今年嘅世界盃先至由香港去日本搵食；佢話覺得中國足球有得做，所以𠵱家蠢蠢欲動。
阿高麗人就慘啲，佢喺世盃後無得唞，因為南韓足球聯賽喺呢個周末開鑼，重話會趁大功臣軒迪克未離開南韓前，再喺佢身上挖啲料㖭，都話我哋無搵錯人寫嘢㗎啦！至於香港嗰幾位呢，聰仔就喺噚日番去哥斯達黎加會愛妻，順便放大假；阿丘同家明就專心教練班事宜，總之就無時停啦！佩服，佩服！
德國龍門簡尼攞咗今屆金球獎，唔少人都話爆冷，不過我求大俠就覺得佢都算實至名歸；因為傳媒係喺決賽前投票，嗰時佢都未犯錯。另外，佢亦好有大將之風，好似佢喺失球前冇耐俾人踢傷右手手指韌帶，但佢事後就話失波同受傷冇關，係自己犯錯啫。
威廉絲只係贏咗兩面溫布頓錦標啫，佢居然夠膽大彈七面溫布頓冠軍嘅嘉芙唔係出色嘅草地球手，話呢位退役前輩好少發球上網，重話加拿大球手嘉倫絲同埋法國杜絲迪比起嘉芙重似草
雖然我求大俠都算係傳媒中人，但有時真係好服啲行家，好似下屆世界盃要四年之後先至喺德國舉行，但有啲內地體育新聞網已經話歐洲各大黑社會準備派成萬個妓女去做生意。喂！四年後呢啲妓女唔少都人老珠黃，有啲好彩嘅都從良咗啦，咁都得？
今年五月離開愛華頓後，一直冇嘢撈嘅三十五歲法國球員真路拿，聽聞好有興趣加盟英甲聯樸茨茅夫。我求大俠聽到呢個消息，真係有啲心噏，事關佢年紀已經有番咁上下，重要喺異鄉踢波。佢搞成咁，係因為九三年對保加利亞嘅世盃外圍賽喺中場失波，最後俾人射入咗，法國出唔到線，令全國人民到𠵱家重憎緊佢，睇怕連佢自己都唔想再番法國球圈發展嘞。