外國記者會（FCC）在六月二十六日本來要搞一個「回歸講座」，搵咗吳弘達（HarryWu）及普林斯頓教授PerryLink演講。搵吳弘達已經試過一次，但俾入境處拒絕入境，呢一次再搵佢嚟，當然絕無把握，結果吳弘達直情攞唔到入境簽證。至於林教授，雖然係純種白種美國人，入境唔使簽證，但喺機場亦俾入境處留難咗四十五分鐘。林教授喺星期四（七月四日）會到FCC演講。
入境處受保安局領導，保安局局長係特首身邊紅人葉劉淑儀，呢位女士愈來愈要顯示女強人本色，作風強悍，對FCC明剃眼眉，唔怪得FCC主席TomCrampton發表聲明話：「作為一個投身於言論自由的機構，我們恐怕香港移民局已開始左右我們開展公開討論香港前途的努力。」
葉保安局局長嘅強橫作風，在強行推出反恐法呢件事上，表露無遺。面對議員質詢，佢話：「點對得住祖國？點對得住美國？點對得住英國？」（詳見《信報》，六月二十八日）嘩，咁講法，有冇對得住香港人呀？一方面佢嘅手下（入境處）盤問美國名牌教授四十五分鐘，另方面佢在立法會話「點對得住美國」，真係唔怕笑死人，相信美國佬亦俾佢搞到啼笑皆非。如果樣樣事都要對得住美國、對得住聯合國，二○○七年全面直選廢除功能議席，美國同聯合國一定唔會反對，你估葉局長會唔會幫手向政制事務局局長林瑞麟推銷呢？