董特首新治港班子噚日第一日上班，三個女高官令到八方眼前一亮。八方特登請時裝設計師夏嘉懋幫吓眼評一評。
夏嘉懋話，環境運輸及工務局局長廖秀冬雖然唔着代表環保嘅綠色，但一身黑白銀灰配搭，清爽、簡單、自然，亦令人感覺到她嘅環保形象。廖局長唯一要注意就係條銀灰色百褶裙，因為上身係黑色外衣，令人感覺上身纖秀，但下身就因為條百褶裙而被「放大」。
至於律政司司長梁愛詩黑白色組合貫徹始終，夏嘉懋話，好出到個「律政樣」。她盛讚司長輕塗口紅及掛上鏈墜，令沉實嘅黑白色衣着加添色彩。不過司長噚日個鏈墜可能太重，領口向下垂，上鏡就唔係咁好睇。
最後輪到獨具個人風格嘅保安局局長葉劉淑儀。夏嘉懋指，葉局長一身橙色套裝同襯衫，好bright，不過套裝剪裁似乎有啲尷尬，手肘位唔上唔落，理應係三個骨，但又比三個骨長咗啲。至於件外套，只得一粒鈕，就算無肚腩件衫都會爆開。一句講晒，與夏日驕陽一樣耀眼。
傳真︰2623-9278
電郵︰