最近波鞋界流行有個熱門話題，叫618事件，對班波鞋迷來講，情況等同911咁震撼。
因為嗰日關刀喺Sogo開專賣部，再次推出斷巿科時，結果成千人湧去排隊，犀利過以前Sogo瘋狂減價，關刀為控制人潮，要派籌兼登記身份證。第一日開張就咁墟冚，關刀呢鋪認真威水。
聽波鞋街四哥講，關刀香港高層最近嚴打二五，事緣早前有批「麻麻帆帆」行貨推出，關刀唔想班炒家晨早嚟掃晒啲貨，計劃唔做宣傳無聲無息地出貨，點知最後都係揚咗，又引來排隊黨集結。結果𠵱家內部出晒Notice，提醒員工不得再漏料，否則炒魷。
四哥總結成件事：「好多名牌都話打擊炒家，有啲誇張到對身份證號碼，為確保每人只限買一件，我哋明眼人一睇就知其實係宣傳手法，咁樣做會令件貨矜貴啲、難買啲，自然好炒啲啦。打擊炒風，只不過係口號嚟啫！」
四哥臨尾重爆料，話「我相信」科時極有機會返行貨，另一對可能係LA科時II。排隊黨今季大把嘢做喇。
主持人：大食Jack
八卦熱報：