馬浚偉與佘詩曼昨日在大熱天時下為無綫新劇《帝女花》拍攝外景，由於場面浩大，臨時演員及幾匹馬都難於控制，而他們更迫於無奈坐在馬車上忍受着難聞的馬屎。
馬浚偉與佘詩曼（阿佘）昨日在電視城內拍攝無綫新劇《帝女花》，在古裝街拍攝一場大場面戲份，動用了數十名臨時演員及幾匹被閃光燈嚇得失控的馬匹。
昨日拍攝一場講述馬浚偉（飾演周世顯）與阿佘（飾演長平公主）在大婚前夕入城接受民眾歡呼，但竟被民眾誤以為他們棄明投清而被掟雞蛋的戲份，不過兩位主角在大熱天時下，要忍受地上馬屎臭味，結果二人只好拿着私伙電風扇透涼。
馬浚偉表示按劇本所講是阿佘遭人掟雞蛋，馬浚偉說：「我睇劇本已經笑，因為淨係話會掟中阿佘。」而阿佘聽後亦不甘示弱地說：「佢坐喺我隔籬，掟中我咪即係掟中佢，再唔係等我買通啲臨時演員掟佢，不過萬一真係唔小心被掟中，我都冇辦法。」
此外，昨日所見馬浚偉的膚色明顯曬黑，馬浚偉自言亦擔心不連戲，馬浚偉說：「我都驚俾啲劇迷鬧，周世顯無端端變咗包青天，但係我都堅持唔搽粉底，我寧願唔連戲都唔化白自己，唔係一定嚇到人哋嘔泡。」