正在搞緊供股嘅大凌（211），噚日突然逆市急升19.5％，收4.9仙。經紀陳見小初鬼迷咁睇住隻股，就問小初係咪重未對呢系股份死心？
隻股月底就會搞4合1併股，傳統智慧教落，併親股例必下跌，而且呢系人馬過往作風麻麻，炒高引人供股，但當有人參與供股就唔炒，如果冇人供股收齊貨就mark高，點計都賺唔到佢哋嘅錢。
大凌今次供股都幾騎呢，首先削減股本75%，然後將股份4合1，再進行1供3供股，供股價每股9.8仙，相當於股份合併前每股2.43仙．另外每供5股送1份紅利認股證，同埋送4股長期紅股。
市旺就話唔怕供股唔足額，但今時今日真係好難講，況且呢系人馬嘅往績如數字地球（109）咁，供完股就輸到班捧場客心灰，所以小初點會唔死心？經紀陳真係明知故問。
慕容小初