香港人做生意最叻就是懂得變通，好像香港髮型師阿Ken，眼見香港市道愈來愈差，便立即轉往內地黃貝嶺發展，而且還很適應當地的商業文化，於髮型屋內附設足浴、按摩等。阿Ken還提醒香港人若要創業，最緊要租舖時考慮清楚頂手問題，避免好像他一樣平白給了冤枉錢。
記者：羅蘭 攝影：韋信
阿Ken教路
1.務必要搞清楚誰是舖位業主
2.要把頂手費計算在投資額內
3.找舖位要有耐性，要肯定沒有手尾跟
4.要適應當地處事手法，香港人已沒優待了
5.辦妥所有手續，否則容易惹上官非
阿Ken在97年前已感到香港的髮型市道競爭劇烈，價錢愈鬥愈賤。他說最高峯時尖沙嘴的髮型屋，剪髮連洗頭要$300-$500，現在$40都有交易，因此在這種情況下，到內地發展是必然趨勢。「我知香港有好多髮型師都希望去內地發展，但礙於唔熟悉市場，所以遲遲唔敢上嚟。而我早幾年已經嚟深圳轉做海產生意，生意上軌道之後，其他拍檔都想做番老本行搞髮型屋，於是就喺舊年十二月開咗呢間Salon。」
牌照申請
1.消防驗收合格證
2.衞生許可證
3.工商執照
4.髮型師技術等級證
5.稅務登記證
＊以上證件所需費用總數不超過?200
初哥撞板
開Salon不同做海產，阿Ken覺得找個好地點非常重要。「黃貝嶺人口較集中，二十四小時都咁多人行，雖然價錢唔可以訂到好似髮型屋咁貴，但勝在密食當三番。不過我哋因為太心急，一見到呢個舖就決定租，重畀咗三十萬頂手費，但上手租客留低嘅鏡、枱、櫈等，根本唔配合我哋嘅裝修，最後所有嘢根本唔要得。
「唔單止咁，租舖時最好要查清楚邊個係業主，因為呢度好興租上租，如果唔係，你簽咗嘅約就會唔算數。重有租舖時要事先聲明自己對上手租客嘅嘢唔會負上任何責任。我哋嗰時乜都唔知，前租客原來無交一個月租同兩個月電費，總共三萬幾蚊，業主要我哋負責，如果唔係就唔畀我哋裝修。」意料之外的事情還接踵而來。
「呢度好多Salon都要客人先畀錢買特價套票，所以頂手時要講明客人跟上手租客嘅轇轕唔關自己事。我哋初時都有十幾個客拎住套票嚟幫襯，我哋惟有孭上身照做。」
連內地員工都令阿Ken感到頭痛，「喺香港你點會見到啲髮型師、洗頭個頭咁老套！呢度嘅女仔全部留長頭髮，又直又貼面，鬈啲都話唔得；我叫佢哋剪髮，佢哋寧願辭職都唔肯剪，於是我開始放棄。佢哋做嘢亦唔會好似香港人咁搏，做洗頭嘅完全無諗過要做師傅，洗頭就係洗頭，連執毛巾都要畀阿姨（女工）做，亦唔會想偷師學剪髮。」
宣傳攻勢
黃貝嶺一帶共有三十多間髮型屋，阿Ken話自己的一間算是數一數二，可能因為香港人開的關係，是以幫襯的客人中，半數是香港人。「嚟緊我哋會請一個喺香港大Salon做嘅師傅，每逢星期日至二上嚟剪髮做宣傳，重可以藉此提升呢度班內地師傅嘅水準。其實要突圍而出，我哋都做咗好多推廣攻勢，例如?55包洗頭、洗面、推拿（1小時）和足浴（1小時），以平價去迎合呢度客人嘅需要。
開舖半年以來，阿Ken從未為營業額而擔心。「我哋做第一個星期已經有18萬生意額，𠵱家平均每日都有100個客，我哋有信心一年後可以取回成本。
「為咗幫香港同行上嚟創業，我哋打算做特許經營，佢哋只需用三十幾萬就可以開一間同我哋舖頭差唔多面積嘅髮型屋，唔使畀任何特許經營費，只需要每月畀營業額嘅10-15%作為管理費；又或者選擇同我哋合作開舖，咁連管理費都唔使，但當然佢哋本身要係髮型師啦。所有裝修和需要嘅用品，我哋都會幫佢哋搞晒，總之唔會再好似我哋初嚟甫到咁行冤枉路。」
辦足手續
在內地開髮型屋，持牌人先要攞一個髮型師牌，才可向有關方面申請其他執業牌照。「首先要去勞動局參加培訓，如果本身係髮型師，培訓半個月後考試合格就可以攞技術等級證，成為認可嘅髮型師。由培訓到攞證書，約花一萬蚊左右。」
阿Ken表示因為自己和拍檔是香港人，對內地手續並不熟悉，於是找來一個內地拍檔，負責辦理所有營業執照。「住喺深圳嘅人，好多都係來自外省，所以我哋要幫員工辦生育證、暫住證。呢度嘅稅項又繁複，差唔多每個月都要交稅；政府每個月又有唔同嘅例行檢查，今個月查消防，下個月查員工暫住證，做唔足手續就要罰錢。
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。