父愛真係偉大,巴西前鋒朗拿度無喇喇剪咗個河童頭,原來係為咗佢兩歲大嘅仔朗拿德。話說朗拿德喺巴西對英格蘭嘅八強賽中,竟然兩次認錯咗巴西後衞卡洛斯係朗拿度,重走去電視前猛錫螢幕咁話:「爸爸!爸爸!」朗拿度於是把心一橫,剪咗個古怪嘅河童頭,包個仔認得。
我求大俠就喺「哨牙仔」呢件事上面得到啟發,唔怪得之英格蘭嘅「萬人迷」碧咸成日剪埋晒啲騎呢髮型啦!莫非佢又係驚個仔布魯克林唔認得佢?而所有做人老竇嘅,亦可以仿效呢兩位球星,剪個突出髮型,加深子女對佢哋嘅印象,溝通都易啲啦。
同人唔同命,原來同名都唔同命,好似有兩個南韓人佢哋個名分別同南韓球星李榮杓及安貞煥相同,結果前者開咗間「榮杓飯店」,喺世界盃期間客似雲來,但係叫安貞煥嘅sales每次打電話推銷,好有禮貌咁話「你好,我係安貞煥」嘅時候,對方都以為佢玩電話而鬧佢,搞到佢十分之冇癮。
國際米蘭都算陪住朗拿度衰足幾年,今次朗拿度翻生,國米重唔乘機耀武揚威?決賽後國米會長莫拉堤不知幾多嘢講,猛咁話一早知朗拿度今屆會好掂,至於官方網站首頁網眉即刻打咗世界冠軍幾個字。喂,聽講世界冠軍係巴西,唔係國米喎。
德國輸畀巴西後,門將簡尼怪自己出錯之餘,重賴埋球證哥連拿腳頭唔好。事關簡尼話拜仁同德國喺歐冠盃同世盃外圍賽輸畀曼聯同英格蘭,咁啱都係哥連拿執法,所以佢就話哥連拿唔利德國人。之但係,呢啲咁迷信嘅嘢,信唔信就由得讀者自己判斷吓啦。
講開世界盃冠軍戰,我求大俠覺得最唔抵嘅係巴西中場卡卡,佢喺下半場末段一早熱晒身,諗住可以喺決賽亮吓相,點知佢啲隊友點都唔踢個波出界,卡卡就喺場邊企到完場。雖然佢只有二十歲,來日方長,但四年後點知係乜嘢世界,入唔到選咁點算!