話咁快又7月，回歸五年，對地產業而言呢五年簡直連場噩夢，樓價跌六成，負資產廿萬，通行冇啖好食；蘭西亦奉命要資源增值，將此專欄寫長一倍，各方友好如果有料，拜託通知一聲。
言歸正傳。長實申請以「臨海最高住宅大廈」資格，列入健力士世界紀錄大全嘅紅磡海名軒，近嚟不斷有內地富豪南下睇樓，噚日一早又有一批30幾人到場，但睇落班人唔似買樓。蘭西向長實查詢，原來呢班人士來頭唔細，有北京建築設計規劃嘅官員、大學建築系教授，以及北京及青島等地嘅發展商。
負責樓盤銷售嘅營業經理黃思聰話，長實之前都接待過新加坡、馬來西亞同南韓官員，南韓原來都有意響漢城起番座同海名軒咁高嘅住宅，所以嚟香港觀摩。佢重透露，已有內地攝製隊嚟過拍特輯，公司稍後會接觸星馬等地傳媒，邀請拍特輯。名氣有價，知名度係資產，明白。
恒基近年賣樓都好興搞嘉年華會，現場氣氛熱鬧好多，唔知係咪請嘅歌影視藝人以唱懷舊歌曲為主，蘭西響大角嘴港灣豪庭現場見到，好多公公婆婆一早就嚟霸定位聽歌，聽完之後就去攞嘢食，有免費飲食又有娛樂，都唔知幾盞。不過發展商對住佢哋就冇晒計，因為打開門口做生意，始終唔可以隨便趕人走，如果得失班客，影響公司形象就更大鑊。港灣豪庭有成千貨尾待沽，睇嚟班公公婆婆有排可以享受「免費午餐」。
踏入下半年，又到回顧展望嘅時候，各代理行同測量師行，都藉此機會增加見報率，中原今日就有個豪宅回顧展望記者會，世邦魏理仕今日亦有回顧及展望記招，主要係講整體市道前景。按照過去經驗，呢啲記者會應該陸續有來，對普羅大眾，有人整理資料幫大家重溫市況都係好事，雖然，個市睇番轉頭，仍係乏善足陳。
世界盃告一段落，市場注意力又轉回樓市，今個月重頭戲當然係新地馬灣珀麗灣，各大代理行都希望，能夠搶先同發展商揸fit人雷霆齊齊亮相做宣傳，今個禮拜二到五，中原同美聯都有活動搞，而雷霆統統冇托手踭，全部都出席。
美聯今日搞空中直擊珀麗灣，坐直升機睇樓，而黃主席都會現身。禮拜五就係美聯全民大會。
中原就用7萬蚊響禮拜三租咗尖沙嘴新世界中心濟哥間「新冶NewEra」，配合現場視覺效果，播放幻燈片，加深250個主管對珀麗灣嘅認識。新冶NewEra係本港大型派對場所，蘭西重收到中記一張貼咗乾花響上面嘅邀請卡。另外，禮拜四又係中原月會。照咁睇，今個禮拜見報率最高嘅非雷生同珀麗灣莫屬。
蘭西