有報紙造「回歸食乜菜」的文章，走訪各界名人。回歸五年踏正世界盃決賽，最應景的食物是波餅。香港是產餅勝地，老餅特別鍾情老婆餅與雞仔餅，嫁娶則流行派西餅。離婚率愈來愈高，未知應該派乜餅。水泡餅因為名字跟香港今日的經濟環境接近，很受歡迎。燒餅就太熱氣了，心浮氣躁的香港人不宜沾口。燒餅歌倒可以研究一下，逐個字斟酌，看看有沒有救港符弗。
波餅，食正的話，唔講得笑。波餅賀回歸，當然是贈興。香港市民像無奈的球員，被安排到死球點前罰企，僅能以手護住死位要害，硬生生吞一腳波餅。球賽九十分鐘，勉強應付得來。加時再踢三十分鐘，頂多再捱一至兩個波餅而已，硬住頭皮等完場吧。但香港剛剛在七月一號宣佈加時踢的這場特區分組賽，法定時間嚇死所有國腳，是五年乘365日乘24小時，等於43800小時！等於踢足二萬一千九百場球賽，每場都加時！就算是全機械的RoboCup足球隊都會冇電癱瘓！
由特區領導人欽點的麵包師，炮製的波餅滑不溜手，方便高官們脫手。硬接波餅唔係唔得，只要市民幻想自己是大猩猩簡尼，將波餅雙槌打出，唔好同個波餅有親。在未來關鍵的五年，叻人暫時行低調，別自認好波，見到WorldCup型人物，速速閃開。有得揀的話，寧願做後備。冇啖好食，都好過鯁波餅。