採訪韓日世界盃決賽周一個多月，不論場內場外都有唔少事情為小記帶來驚喜，尤其係不少二三線隊伍突出嘅表現，證明世界盃唔再係強隊天下嘅賽事，娛樂味更濃。
球場內，韓日主辦國隊伍翻新歷史打入四強同十六強，令世界對亞洲足球重新評估，加上塞內加爾、土耳其及美國突出嘅表現，反映世界盃決賽周大部份球隊對賽，再無明顯高低之分，任何事情也可在這項四年一度盛事中發生。
球場外，從各方面都感受到南韓同日本都好希望將今次賽事辦好，可能逗留喺南韓日子較長，始終對當地發生嘅事印象較深刻；球迷一次又一次狂熱慶祝，大型吹氣足球可以出現喺馬路、數十萬人喺酷熱天氣下坐喺街頭睇大電視直播賽事；同一時間做出同一反應情景，相信只有世界盃先至可以見到。
當然，喺日本幾日亦同樣有驚喜，其中決賽頒獎禮時二百多萬隻紙鶴從天而降嘅景象，的確為在場嘅所有人帶來歡樂氣氛；重有就係有唔少香港球迷親身到南韓同日本睇世界盃，也知道香港喺世界盃期間唔少人透過街頭大電視睇波，足球文化喺香港比四年前又到咗另一境界。
記者梁國威東京專電
《東京中日體育》「朗拿度世界第一帶淚成為入球王巴西完全勝利史上首次7戰全勝」
《日刊體育》「巴西優勝朗拿度射入2球與比利看齊」
《今日體育》「巴西世界最強第5度奪魁朗拿度與比利看齊21世紀之王」
《日本體育》「朗拿度射入致勝2球」
《體育知報》「世界第一朗拿度喜極而泣 李華度首次展露笑容」
《產經體育》「朗拿度世界第1巴西第5度捧盃」
《今日頭條》「2002年世界盃巴西一雪前恥」
簡評 ：日本體育報章周一全以巴西第五度捧走世界盃冠軍作為頭條新聞，其中三份更以跨版形式報道，而射入兩球的朗拿度更成為各報焦點；這位神射手金靴獎得主，過去出席三屆決賽周共射入十二球，該份報章形容他的成就與球王比利看齊。