馬季歇暑，世界盃落幕，剛踏入7月份，趙飛雲突然感覺一片空虛，唔知有乜嘢寄託，希望港股7月走勢可以明朗啲，吸引股民重新入市，唔使港股繼續死氣沉沉。
恒指6月份最後兩個交易日反彈，外圍股市亦大致穩定，如果噚晚美股唔大跌，恒指今日或者可以承接餘勢，繼續造好啲。
藍籌股中暫時以地產股最值得留意，新地（016）近排都經常提及，上周五MACD線輕微升穿訊號線，啟示技術走勢可能有轉機，值得優先留意。新地近期低位56.25元，唔排除稍後再升會有短線獲利回吐，但如果見10日線守得穩，不妨先買1注。
另外一隻值得留意嘅股份亦係地產股──恒地（012），通常地產股郁動，龍頭股新地會先行，而恒地則會追落後。恒地上周五亦重返10日線之上，收32.40元。平均線走勢亦與新地相近，暫受制於20日線（現處33元）阻力，但恒地9RSI出現明顯嘅底背馳，見底有望。
恒地短期若升破20日線阻力，將上試50日線35元，短炒有8%左右上升空間，值博率唔算低。如果能夠善用窩輪嘅槓桿效應，當然會更加和味。短期而言，地產股嘅不明朗因素較少，可以玩得較為安心。
趙飛雲