當財經版老總講起公營機構行政總裁削薪單新聞，問佢事先知唔知，老總話：「呢啲係政治組嘅事，我哋冇理會，曾蔭權只係請啲政治組、新聞組嘅同事去，其實我哋對行政總裁嘅薪酬水平重熟啦，曾司長唔請我哋去，係佢嘅損失。」
問老總：「如果財經版啲記者去，又會唔會有人唔聽司長話，搶先爆料呢？」老總話：「唓，呢單新聞有乜咁大啫，搶到都冇用，或者政治新聞比較平淡，先至有人唔聽朱曼玲嘅要求啦。我哋財經版啲人更守規矩。六月二十五號，港交所知會各報財經版，將有一份關於五月二十八號嘅停電報告交畀立法會，但要喺六月二十六日先至公開，請大家唔好寫住。好嘞，喺六月二十六日，你見到財經版有呢單新聞冇？冇吖嘛，全部行家都守諾言，喺六月二十七日先至出呢單新聞，證明財經版嘅人比政治組嘅同事更遵守遊戲規則。以後曾蔭權、朱曼玲要事先放料，要embargo，最好搵我哋，唔好搵啲政治記者！」
哈，佢講到似層層，不過講得幾好聽。阿松喺六月二十六日見記者，講新高官面對傳媒，一定唔好相信有「非正式特訪」（off-record）呢回事，即係話記者不可信啦，唔知阿松係唔係受得教訓多，有感而發呢？不如咁啦，以後啲高官一啲都唔講，等傳媒去挖掘，睇吓邊個真係醒囉。