陳奕迅（Eason）、蕭亞軒同李雲迪等人，噚日喺紅館為今日舉行嘅「龍聲飛揚萬人青年音樂會」綵排，但Eason可能太緊張，所以唱到一半就停咗，之後要再排多一次。而蕭亞軒噚日嘅打扮，驟眼睇有啲似韓國變性女星河利秀。
問蕭亞軒覺唔覺得自己似河利秀？蕭亞軒用國語話：「其實有一個韓國製作人都曾對我說我像她，我看過她的相片，我就覺得不是太像，可能是髮型問題。」蕭亞軒重話河利秀好有女人味，又sexy又靚，身材好好，佢話：「聽說韓國可以整容，可以把不漂亮的變成漂亮，河利秀實在太漂亮啦！我不及她漂亮，但是我不介意別人說我像她，如果我有機會跟她合作也好，我沒有所謂。」
此外，李雲迪噚日就以一身古銅色肌膚示人，為佢增添唔少陽光氣息。
前晚黎思嘉同亞視其他藝員，喺尖沙嘴海洋皇宮酒樓睇世盃決賽。
黎思嘉透露近日連番受到電話騷擾，所以已經改晒手提電話同傳呼機嘅號碼，黎思嘉話：「近兩個月來，不斷有一個男人打電話嚟話想識我，重問我幾多錢，起初覺得好小事，但𠵱家愈諗愈驚，如果改咗電話後，都受到騷擾，我就會報警。」
古天樂噚日喺台灣做宣傳時，大談追女仔嘅心得。
古天樂雖然經常喺電影中扮演「花心蘿蔔」，但喺現實生活，佢對待女仔原來另有一套，古天樂用國語話：「我覺得對女孩子講話要誠懇，眼要望住她，這樣對方才會了解你的心意。」
男子組合Shine嘅成員徐天佑，佢中學時曾係學校籃球隊隊長，馮仁昭聽講佢當年好受女同學歡迎。
天佑話：「係呀，成日有女同學放啲信喺我個儲物櫃，我睇過啲信，如果署名我識嘅，我會當面叫佢哋唔好玩，唔識嘅就會唔理。」
近日劉德華雖有官非纏身，但工作依舊接踵而來。
劉德華除咗即將推出新唱片，近日台灣錢櫃KTV重請咗佢擔任代言人，喺台北市嘅大樓外牆，掛咗一張大大幅、印有華仔笑臉嘅照片，令每個路過嘅人，都可以見到華仔個俊樣。
吳宇森日前完成新片《烈血追風》香港嘅宣傳活動之後，就去咗日本，今晚佢會到台灣宣傳，而台灣影迷對於吳宇森嘅親民形象，非常受落。吳宇森喺訪問度話過自己對《烈》片中嘅軍服要求好嚴格，希望可以盡量展示真實感。而吳宇森離開台灣後，會返香港出席張徹導演嘅喪禮。