世界盃決賽周六十四場賽事踢完睇完，亞洲盤原來長捧下盤真係有着數㗎，起碼有近半勝出率！除此之外，各項賭盤之中，又有冇邊啲項目係值得留意及日後追敲呢？以下是部份項目的分析，以供參考。
有人話玩「入球單雙數」，永遠都係玩「雙數」着數啲，因為一開波個比數○比○就已經「叫胡」（無入球都計作雙數）。事實上單、雙數嘅賠率都係一樣，科學啲去睇就機會均等，冇話邊瓣着數啲嘅，不過睇今屆賽事入球統計，「雙數」呢瓣好似真係着數啲喎。
受到近屆世界盃一啲「異路奇兵」崛起嘅成績及戰果影響，賽前好多人都講話要玩今屆賽事，就要長追下盤。結論係佢哋講得冇錯，塞內加爾贏法國、意大利輸畀克羅地亞、美國力克葡萄牙等戰果，都令大部份人始料不及，包括開盤嘅莊家，當然買下盤多數低水。
世界盃賽事始終水準較高，少有如歐洲聯賽般爆冷賽果出現，半/全場「A/B」一次都未開過，「B/A」開過三次，都係有實力強隊落後之下，到下半場後上反勝對手。「和/A」雖然開得最多，但都要拜兩場準決賽及決賽、巴西及德國嘅賽事所賜。但今屆B/B值博率最高。
心水清嘅球迷，都應該會記得近幾屆平均入球數字，均達到二點幾球。而今屆「二至三球」呢個入球數字範疇亦係開得最多次嘅，非常正路。不過，「二至三球」呢瓣好多時都只係得七、八折嘅回報，你長追嘅話一定無運行，只適宜喺無乜心水但又想玩嘅時候追下。
一比一戰果共開出「十二次」，成為最旺門波膽，不過呢門波膽嘅分頭就永遠唔會多，平均都係五至六倍，拉勻條數，六十四場長追都唔會太有「肉食」。講到最抵博嘅，就係牌面較弱一方贏三比二呢個波膽，雖然只出現過三次，但每次都有三十倍以上，我哋名家波神及戰鬥員A就曾經喺擂台榜敲中過嘞！
其實成個賽事嘅每場入球平均數係兩球以上，理應就以「入球上盤」呢瓣比較抵追，不過只限分組賽。如果識得喺次圈（十六強賽事）開始轉捧下盤嘅話，就真係贏到「開巷」，事關由十六強到決賽嘅十六場賽事入面，只係開過「三場」「入球上盤」咋！
十六強以互射十二碼決勝不敵西班牙而出局嘅愛爾蘭，四場賽事亞洲盤全贏，值捧率百分百。不過踢足七場嘅冠軍隊巴西，總成績為五贏一輸一走盤，輸嗰次只係分組賽首場，僅輸半個盤畀土耳其而已，所以巴西總回報率，以半個盤力壓愛爾蘭。
如果閣下喺世界盃期間，敲定本報任何一位名家，跟足佢喺每個比賽日提供嘅估波心得去玩嘅話，要有獲利何難之有！九位名家之中，大部份都能夠以盈餘分數完成今屆賽事，一定唔使蝕本；而且呢個擂台喺賽事期間，幾乎日日都有波膽敲中，當中更不乏信心佳作以及大冷波膽精選。
以分組賽階段成績嚟睇，波王、青蛙仔、藍鑽石都能交足功課。波王及藍鑽石均以亞洲盤命中率高見稱，相信兩人長期位處榜前列嘅「形象」，已打進讀者們的心中吧。
青蛙仔在波膽方面不時見有佳作，德國大勝沙地八比○一役，青蛙仔心水最清，命中德國「淨勝五球或以上」波膽。
頭一周賽事「脫腳」嘅波神及華度，前者喺踏入分組賽次輪賽事之後，已開始急起直追，連場命中亞洲盤及波膽之下，即火速收復前失，並殺上榜中游位置，奠定最後奪冠根基；華度亦於十六強起發力窮追，二千分重敲巴西對比利時上盤，以及五百分敲巴西勝英格蘭二比一，可謂一時佳話。
一直喺榜中、上游徘徊嘅戰鬥員A，最後能夠殺入三甲，都拜準決賽南韓對土耳其一役的準繩眼光所賜，土耳其勝三比二呢個三十五倍大冷波膽，戰鬥員A小敲二百分，有七千分回報。同場波神亦命中呢個波膽，更即時由第四位升上榜首，最後保持優勢衝過終點。
一日之內有兩位名家同時敲中呢啲超冷波膽，肯定唔係「符碌」啦！