大家好嗎？又係我好姨薛家燕呀！噚日同大家介紹完一味補氣唱歌嘅湯水之後，今日介紹呢一味湯，都好啱一家大細飲用㗎。
最近《皆大歡喜》嘅集數由二百集加到去三百集，我哋做演員嘅梗係開心啦，事關集數一加再加，證明部劇受觀眾歡迎之外，遲吓我個大女珊珊（石祐珊）去美國讀書嗰筆學費，又有着落，你話幾好呢！
不過做我哋呢行壓力真係好大，好多時因為日拍夜拍關係，唔係搞到唔夠瞓，就係搞到失眠。聽講有啲藝員重慘，佢哋好多時喺荒山野嶺拍外景，冇地方大小便，於是惟有死忍爛忍，結果忍到便秘。
今日我好姨介紹呢味「清音潤燥湯」，就係針對上述問題，因為呢味湯有滋陰生津、潤燥安神、清音同通便作用，適合喉乾聲沙、咽喉疼痛、乾咳冇痰、大便乾結、痔瘡下血、便秘、心情煩悶同失眠嘅人飲用；正所謂「飲咗清音潤燥湯，唔使晚晚眼光光！」
（五之二） 採訪：戴彩煥
攝影：陳慧安
顧問：何國璋中醫師