電盈將手上四成CSL賣埋畀澳洲佬，小小超李澤楷成功減債四十幾億，難怪馬時亨都可以讓畀董叔叔。呢個賓卡，小小超一年前私人出二千萬元電盈股票做見面禮自大通挖角，目的都係為電盈處理債務，冇理由咁易放人；所以，馬局長入閣，唔少人都認為係李家嘅部署，加上曹仁超隱隱約約但行內人都明嘅內幕，大家更深信不疑。
不過，小小超昨日就好豪氣，對指佢放隻馬入董家班之說不止唔嬲，重笑住話：咁不如將佢畀番我，電盈隨時都可以請番佢喎。
講起批見面禮，八方有次同一位馬局長嘅老友傾偈，佢話局長如果要更上層樓，上策係將批股票送回小小超，中策係賣咗佢，否則永遠會成為人家話柄。後來馬局長承諾會賣清手上股票；昨晚佢一見記者，就好醒目咁自動爆料，話已經賣晒所有電盈。
八方知道佢其實都有苦衷，因為真係有老友建議過佢將賣股票嘅錢，捐晒畀公益金。不過馬時亨對八方話：如果捐咗啲錢實俾老婆鬧到飛起，因為要供樓。大家信唔信呢個理由呢？
至於馬時亨點解可以咁快放棄楓葉國國籍，八方聽聞係由三個政府出頭搞掂，真係唔簡單。
傳真︰2623-9278
電郵︰