美股上禮拜五先升後回，杜指收市微跌27點，納指則仍升6點，標普打和。長假後港股估計反覆。
恒指上禮拜5個交易日埋單升近7點，九倉（004）跌20仙。九倉上禮拜喺18元左右搵到支持，收18.40元，短期有機會上番些少。去年盈利微增1%，PE17.9倍，唔算貴。今年預測上升20%，PE降至15倍，盈利質素實淨，基金捧場。
九倉Call輪可以執些少，9149係主角。上禮拜五最高22.6仙，收20.5仙，兩個月跟正股散落嚟，散咗6成有多，𠵱家啲數據都算唔錯。下月12日夠鐘，溢價2.2%，槓桿率9倍。正股喺下月12日前見番6月高位19.60元（只係升6.5%），唔係冇可能。正股見呢個價，9149見28仙，都有37%水位。
香港賀回歸5周年，老牌紅籌可以睇高些少。中信泰富（267）過去5日共升35仙，相信髹灰水動作繼續存在。
中信髹灰水，留意吓中信Call輪，例牌對象係9160同9037。前者數據吸引，後者壽命長啲，交投多啲。
章 盛